Further Information

Það er mikilvægt að þú skiljir að hvernig þú sérð þig og upplifir – hvaða viðhorf þú hefur til þín – mótar sýn sem framkallar það sem þú sérð fyrir þér og einmitt þetta verður sá veruleiki sem þú skapar. Mig langar að þú skiljir hvaða lífsins auðlegð opnast þegar þú tekur ábyrgð á eigin tilvist, verður valfær og eykur eigin heimild til hamingju og þakklætis. Ég vil sjá þig auka heimildina og finna þar hugrekki og áræðni til að lifa til fulls, á þínum forsendum; að sjá þig skilja að enginn er eyland og að aðeins með því að þiggja og gefa af þér geturðu þrifist í lífinu og látið þig skína til fulls.

Þetta er það sem ég vil – en hvað langar þig? Langar þig að breytast? Þetta er gildruspurning sem ég legg alltaf fyrir í gamni á námskeiðunum mínum. Flestir rétta auðvitað upp hönd og staðfesta að jú, þeim „langar“ að breytast. Þá bendi ég góðfúslega á að í þessu viðhorfi felist höfnun á eigin tilvist og öllum manns gjörðum fram að þessu.

Við komum okkur þangað sem við erum – með miklum tilkostnaði. Við höfum varið allri ævinni í að verða svona, núna, eins og við erum. Hvers vegna erum við þá að hafna því? Við þessu eru mörg svör og þau opinberast í bókinni, en núna, einmitt núna þegar þú lest þessi orð vil ég biðja þig um að meðtaka eftirfarandi orð með hjartanu, með skilningi dýpst úr hjartanu:

Þú getur ekki farið fyrr en þú ert kominn. Vilji er verknaður, ekki löngun, þrá, ætlun eða von. Máttugur er mættur maður sem hefur fyrirgefið sér og vill sig umbúðalaust.

Guðni er fæddur árið 1954 og uppalinn í Keflavik. Í dag rekur hann Rope Yoga Setrið á Garðatorgi í Garðabæ og GlóMotion Inter­national ásamt eiginkonu sinni Guðlaugu Pétursdóttir og starfar samhliða því við lífsráðgjöf, námskeiða­ og fyrirlestrahald, þjálfun GlóMotion kennara, almenna GlóMotion heilræktar þjálfun og skriftir.

Starfsferill Guðna við hug­ og heilsurækt spannar fjörutíu ár og var hann fyrsti einka­ þjálfari á Íslandi. Árið 1982 stofnaði Guðni Vaxtarræktina hf en hún var í senn innflutn­ingsverslun og líkamsræktarstöð og hafði það að markmiði að hvetja til andlegrar, huglægrar og líkamlegrar heilsuræktar.

Guðni stofnaði tímaritið Lík­amsrækt og næring og fram til ársins 1988 var hann útgefandi og aðalritstjóri þess. Á árunum 1987–1989 veitti hann forstöðu deildar innan Máttar fyrir heildræna þjálfun hugar og líkama. Máttur var hugarfóstur hóps lækna og starfsfólks í heilbrigðiskerf­inu þar sem lögð var áhersla á nýja og heild­ræna nálgun við heilsu og líkamsþjálfun.

Samhliða þessum störfum aflaði Guðni sér víðtækrar þekkingar á samspili huga og líkama í gegnum jóga, næringarfræði, nátt­úruleg bætiefni, líkamsþjálfun, lífstílsþjálfun og ráðgjöf

Umbreytingarsálfræðin sem Guðni hefur hannað og þróað er einkum afrakstur dvalar hans í Los Angeles á tímabilinu 1990–2006. Þar starfaði hann við heildræna þjálfun líkama og sálar og við lífsráðgjöf fyrir ein­staklinga og hópa. Samhliða vann hann að þróun og hönnun Rope Yoga kerfisins og æfingastöðvarinnar, en kerfið tengir hugrækt, líkamsrækt, næringarfræði og orkuumsýslu í eitt heildrænt velsældarkerfi sem kallast GlóMotion Heilrækt. GlóMotion námskeið hafa verið iðkuð í Rope Yoga Setrinu við góðar undirtektir frá árinu 2008.