Further Information

Silfuröld revíunnar 1957-2015

Í samvinnu við útgáfuna Skruddu er ég að safna fyrir útgáfu á seinna bindi íslenskrar revíusögu eftir mig, bókinni „Silfuröld revíunnar“, en bókin á að koma út á næsta ári 2024. Revíur eru gamanleikrit sem gera grín að samtímanum, jafnvel að nafngreindum stjórnmálamönnum eða öðru þekktu fólki. Oftast eru söngvar í revíum og hafa sumir orðið þekktir. Fyrra bindið, „Gullöld revíunnar“ kom út 2019. Í þeirri bók er fjallað um íslenskar revíur 1880-1957, meðal annars þann tíma sem kallaður var „gullöld revíunnar“ á Íslandi, en þá voru m.a. sýndar revíurnar „Haustrigningar“, „Hver maður sinn skammt“ og „Allt í lagi, lagsi“ og samdir þekktir revíusöngvar eins og „Tóta litla tindilfætt“ og „Ég hef elskað þig frá okkar fyrstu kynnum“.

Seinni bókin, sem nú er safnað fyrir, á að heita „Silfuröld revíunnar“. Þar er fjallað um íslenskar revíur 1957-2015. Margir halda að revíusýningar hafi liðið undir lok á þessum tíma, en í rauninni er öðru nær. Flestir þekktustu gamanleikarar þessara ára, svo sem BessiBjarnason, Laddi, Edda Björgvinsdóttir og Spaugstofumenn, tóku einhvern tíma þátt í revíusýningum. Í bókinni verður einnig fjallað um söngleiki Jónasar og Jóns Múla Árnasona, svo sem „Deleríum búbónis“ og „Rjúkandi ráð“, en þessi leikrit hafa stundum verið kölluð revíur, og söngvar úr þeim eru alþekktir, svo sem „Einu sinni á ágústkvöldi“ og „Fröken Reykjavík“. Rakinn verður söguþráður nokkurra helstu revíanna 1957-2015, fjallað um viðtökurnar sem þær fengu og birtar margar myndir úr þeim. Fyrstu áramótaskaupin koma líka við sögu. Þá verða í bókinni niðurstöður fyrir allt verkið og listi í tímaröð yfir allaríslenskar revíur sem vitað er um 1880-2015.

Um höfundinn

Una Margrét Jónsdóttir hefur starfað sem dagskrárgerðarmaður hjá Ríkisútvarpinu frá 1990 og á árunum 2009-2010 fjallaði hún um íslenskar revíur í útvarpsþáttunum „Gullöld revíunnar“ og „Silfuröld revíunnar“ og tók þá viðtöl við fólk sem mundi revíuárin. 2009-10 komu líka út hjá bókaforlaginu Æskunni bækur Unu Margrétar: „Allir í leik“ I-II sem fjölluðu um íslenska barnaleiki með söngvum og texta. Fyrir þetta ritverk fékk Una Margrét viðurkenningu Hagþenkis árið 2010. Árið 2019 fékk Una Margrét Liljuna, viðurkenningu Þjóðkirkjunnar fyrir framlag í þágu kirkjutónlistar, en viðurkenningin var veitt fyrir útvarpsþættina „Blaðað í sálmabókinni“ sem voru á dagskrá Ríkisútvarpsins 2018-2019. Fyrri bók Unu um íslenska revíusögu, "Gullöld revíunnar", kom út hjá forlaginu Skruddu 2019.

Um útgáfuna

Bókaútgáfan Skrudda var stofnuð af Ívari Gissurarsyni og Steingrími Steinþórssyni árið 2003. Forstjóri hennar nú er Steingrímur Steinþórsson. Hjá Skruddu hafa komið út bækur af ýmsu tagi, svo sem skáldverk, fræðibækur og barnabækur.