Further Information

Kæru vinir.

Nú leyfi ég mér að leita til ykkar vegna verkefnis sem er mérhjartans mál. Mér finnst nefnilega vera kominn tími til að gefa út plötu með nýju efni.

Öll lög plötunnar eru áður óútgefin, samin af mér og flestir textarnir einnig eftir mig. Auk þess eru á plötunni ljóð eftir Þórarinn Eldjárn, Halldór Kiljan Laxness og Kristinn Einarsson. Ég tel að hér sé á ferðinni jafnvel sterkasta efni sem ég hef unnið til þessa.

Til liðs við verkefnið hef ég fengið tónlistarstjórann Jón Ólafsson, sem jafnframt sér um útsetningar ásamt úrvali hljóðfæraleikara. Upptökur fóru fram í Stúdíó Sundlauginni í Mosfellsbæ og í Eyranu hjá Jóni Ólafssyni.

Að plötunni koma einnig framúrskarandi söngvarar sem hver um sig skipa háan sess í íslensku tónlistarlífi, þar á meðal Guðrún Ýr Eyfjörð Jóhannesdóttir (GDRN), Una Torfadóttir, Jakob van Oousterhout, Vigdís Hafliðadóttir, Hallgrímur Ólafsson, Guðjón Davíð Karlsson og Hildur Vala Einarsdóttir.

Markmiðið er að skapa plötu sem höfðar til breiðs hóps hlustenda, óháð aldri, og byggja brú milli kynslóða með íslenska tungu, tónlist og skáldskap að leiðarljósi.

Að upptökum loknum verður platan gefin út á vínyl og geisladiskum í takmörkuðu upplagi ásamt því að lögin verða aðgengileg á helstu streymisveitum.

Ég vona að þið sjáið ykkur fært að taka þátt í þessu ævintýri og styðja við útgáfu plötunnar. Nái ég settu marki mun það auðvelda mér verulega að greiða óhjákvæmilegan kostnað sem fylgir plötuútgáfu, upptöku tónlistarinnar, hljóðblöndun, laun tónlistarfólks, auk framleiðslu á vínylplötum og geisladiskum.