Further Information

Enginn er eins! Litróf einhverfunnar er gríðarlega stórt og staðalímyndin er föst. Þess vegna er lykilatriði að fræðslan sé einstaklingsbundin. Lausnin sem vefsíðan 'Ég er Unik' býður upp á er einstaklingsmiðað fræðsluefni sem einhverfir eða aðstandendur einhverfra geta búið til sjálfir á auðveldan og aðgengilegan hátt.

Með því að skrá sig inn á vefsíðuna, birtist mikið val af forskrifuðum áskorunum og styrkleikum sem þau velja eftir því hvað passar best við barnið eða þá sjálfa. Möguleikinn til þess að breyta og aðlaga er alltaf fyrir hendi. Valin er hönnun og hægt er að myndskreyta með myndum úr einkasafni. Allur texti er skrifaður á léttan og jákvæðan hátt og er kynningarformið fljótlegt að lesa og auðskilið. Að lokum stendur viðskiptavinurinn uppi með kynningu á veflægu formi eða sem útprentaða bók til þess að dreifa að vild.

En þó svo að áhersla sé lögð á einhverfurófið er vefsíðan ekki bara fyrir þá sem eru með einhverfu, heldur alla þá sem upplifa að þeir hafi annars konar áskoranir sem þeir vilja útskýra og fá skilning fyrir.

Það er einnig mikilvægt að hafa í huga að það þarf ekki að hafa greiningu til þess að fara inn á heimasíðuna og búa til bók um sig sjálfan eða barnið sitt. Það nægir að hafa þörfina fyrir fá skilning frá nærumhverfinu og ekki síst viðurkenningu fyrir að vera sá sem maður er!

Viljir þú fylgjast með verkefninu, endilega fylgdu okkur á Facebook síðunni: https://www.facebook.com/egerunik