Further Information

Nýjasta verkið er Visions fugitives (Hverfandi sýnir) sem John Speight samdi fyrir Gunnar og Elísabetu. Gunnar lýsir efnisskránni með þessum orðum. „Það er einstaklega vel skrifað fyrir bæði hljóðfærin og hljóðfæraleikarana og spannar afar vítt svið sýna þrátt fyrir að vera aðeins um ellefu mínútna langt. Tónsmíðin hefur á stundum sterka hrynjandi en síðan taka syngjandi laglínur og draumkenndari sýnir yfir.

Lengsta verk disksins er eftir franska barokkmeistarann Couperin, fimm konsertþættir sem urðu til fyrir tilstuðlan hins þekkta franska sellóleikara Paul Bazelaire. Hann valdi kafla úr ýmsum verkum eftir Couperin og útsetti þá upprunalega fyrir selló og píanó. Þættir þessir eru að ýmsu leyti ólíkir en mynda mjög fallega heild sem náð hefur miklum vinsældum.

Aðrar tónsmíðar á diskinum eru Litanei og Serenade eftir Schubert en hafa má í huga að hljómur slaghörpu þess tíma minnir töluvert á hljóm hörpunnar. Einnig eru á diskinum Clair de lune eftir Fauré, Aria eftir Bach, auk fjörugs Elddans Watkins fyrir einleikshörpu. Ekki var nauðsynlegt að umrita neitt verkanna fyrir hörpuna. Meðleikurinn í Spænska dansinum eftir Granados er með svolítið gítarlegri áferð sem endurómar í plokki hörpunnar. Auk þess má heyra tvö íslensk lög, Sofnar lóa eftir Sigfús Einarsson og Nótt eftir Árna Thorsteinsson.“