Nánari lýsing

Hljómsveitin Dr. Gunni kemur nú skríðandi með grátstafi í kverkum til að væla út fyrirframgreiðslu frá aðdáendum sínum (ef einhverjir finnast) til að fjármagna sitt næsta meistaraverk, (ENN ÓNEFNT ALBÚM, hér eftir kallað (EÓA)). Hljómsveitin hefur verið að semja og æfa verkið undanfarna mánuði og lofar vinnan mjög góðu. Það er stíf pressa á bandinu því upptökur hefjast í apríl 2024 á Stöðvarfirði. Meðal laga sem verða á plötunni eru stuðpopplagið Í bríaríi, dramatíska kraftballaðan Stella, hið þunga og þróaða Ástandið fyrir botni Miðjarðahafs, og hið líklegt-til-vinsælda rokklag Bónóbó.

Hljómsveitin Dr. Gunni varð til árið 2002 þegar Gunnar Lárus Hjálmarsson stofnaði sveitina með Grími Atlasyni, Guðmundi Birgi Halldórssyni og Kristjáni Frey Halldórssyni. Strax árið eftir kom út meistaraverkið STÓRI HVELLUR. Nýja platan (EÓA) mun koma út seinni part árs 2024 og koma í kjölfar meistaraverksins NEI, ÓKEI sem kom út 2021 og vakti mikla athygli fyrir lög eins og Aumingi með Bónuspoka og Ég er í vinnunni. (EÓA) verður besta plata Dr. Gunna til þessa – um það er algjör einhugur í hljómsveitinni.

Í boði eru fimm fjármögnunarleiðir sem henta fjárhag allra. Elsku besti aðdáandi, láttu okkur nú ekki líta út eins og hverja aðra aumingja (með Bónuspoka), hjálpaðu okkur að ná markmiðum okkar og láttu okkur fá pening – þú munt sko aldeilis ekki sjá eftir því!