Nánari lýsing

Ljóðabókin Dóttir drápunnar - ljóð úr djúpinu eftir Gunnhildi Þórðardóttur er tilbúin til prentunar og er í umbrotsvinnu en hún er væntanleg í nóvemberlok og með þinni hjálp kemst hún í prentun.

Gunnhildur að taka á móti ljóðaverðlaununum Ljósberanum frá Þorsteini Eggertssyni.

Gunnhildur lauk tvíhliða BA prófi í myndlist og listasögu við Listaháskólann í Cambridge í Englandi árið 2003 og MA prófi í liststjórnun við sama háskóla árið 2006. Hún lauk í viðbótardiplómanámi í listkennslu við Listaháskóla Íslands árið 2019.
Gunnhildur hefur ávallt gefið út sínar eigin ljóðabækur og staðið undir öllum kostnaði sjálf og oftast gefið út bækur í tengslum við sýningar en Dóttir drápunnar kemur út á vegum Sæmundar bókaútgáfu.
Útgáfuhóf verður haldið á Bókakaffinu í Ármúla Reykjavík í nóvember en verður auglýst nánar síðar.

Gunnhildur og maðurinn hennar Douglas Arthur Place með vörur eftir RePlace

Gunnhildur hefur verið virkur myndlistamaður síðan hún útskrifaðist árið 2003 og unnið fyrir Samband Íslenskrar myndlistarmanna (SÍM) bæði sem verkefnastjóri gestavinnustofu og Dags myndlistar en einnig setið í stjórn SÍM. Hún starfaði einnig í áratug fyrir félagið Íslensk grafík og hefur haldið margar einkasýningar bæði á Íslandi og erlendis. Hún hefur m.a. sýnt í Listasafni Reykjanesbæjar, í sal Íslenskrar grafíkur, í Flóru á Akureyri, í Mjólkurbúðinni, í Gallerí Boxi með systur sinni sem Lúka, 002 gallerí, í sýningarsal SÍM, Borgarbókasafninu, Slunkaríki, Litla Gallerý og Suðsuðvestur. Gunnhildur hefur einnig tekið þátt í mörgum samsýningu m.a. í Hafnarborg, Listasafni Reykjanesbæjar, Listasafni Íslands, í Artótekinu, Minjasafni Austurlands, Norræna húsinu og tekið þátt í sýningum erlendis í Tate Britain safninu, í Norrænu miðstöðinni í Boston, grafíksýningum í Þýskalandi, Danmörku, Bretlandi, Svíþjóð og Bandaríkjunum. Á tímabili rak Gunnhildur sinn eigin sýningarstað Gallerí Bíll og verkefnið Skáldaskáp þar sem ung skáld á Suðurnesjum komu fram auk þess að reka Myndlistarskóla Reykjaness. Hún starfar sem tungumála-, list - og verkgreinakennari í Myllubakkaskóla í Keflavík. Hún á fjóra stráka og eina dóttur með enska manninum sínum en saman reka þau listaverkefni RePlace sem býr til listrænar vörur með sjálfbærum hætti.

Listaverkið Brot af samnefndri sýningu í Litla Gallerý í Hafnarfirði í febrúar sl.

Listaverkið Blóðflæði frá sýningunni Brot í Litla Gallerý í febrúar sl.

Gunnhildur að störfum hjá Íslenskri grafík.

Áður útgefnar bækur Blóðsteinar 2013, Gerðu það sjálf ljóð - Pönkljóð 2014, Næturljóð 2015, Götuljóð 2017 og Upphafið - Árstíðarljóð 2019.