Nánari lýsing

Hvað er Bonís?
Bonís er einstakur heimur sem er skapaður með list og ímyndunaraflinu. Grunnurinn að Bonís kemur frá frelsinu sem listin bíður upp á, þar sem áhorfandanum er boðið að dýfa sér í heim sætinda þar sem eðli heimsins og raunveruleikinn er sveigjanlegur. Möguleikarnir eru endalausir.

Um listafjölskylduna
Við erum blanda af íslendingum og svisslendingum, sem búum í Mosfellsbæ. Við höfum alltaf lagt áherslu á samstarf. Eitt af því sem við höfum skapað saman er Bonís heimurinn. Öll höfum við komið með hugmyndir og áhrif sem hafa leitt til útkomunnar á Bonís heiminn. Bonís pabbinn og frumkvöðullinn er hönnuðurinn Sigurður Ó. L Bragason.

Frá unga aldri hefur hann notið þess að baka og hægt er að finna mynd af honum í eldhúsinu með þeytara í hendi frá því hann var ungur. Þessi löngun hefur fylgt honum æ síðan. Löngun hans er líka listin. Hún hefur fylgt honum undanfarin 25 ár, síðan hann fór til Bandaríkjanna í nám í listum, hönnun og grafík. Þema listar hans hefur oft verið sætleikinn og hefur hann sameinað þetta tvennt, að baka og listina. Aðal karakterarnir í Bonís heiminum eru leir fígúrur grundvallaðar á tveimur Bonís börnum, Felix og Miriam.
Bonís mamman, Nicole hefur lagt sitt að mörkum með því að taka myndir af viðfangsefnum í Bonís heiminum, auk þess að baka og hafa góð áhrif á uppskriftirnar í þessari bók. Ásamt hinni endalausu sköpun Bonís fjölskyldunnar var hluti af ferlinu við gerð bókarinnar að nota gerfigreind til að koma með hugmyndir.

Upphafið
Í upphafi feðraorlofsins eftir fæðingu sonarins Felix, fyrsta barnsins í Bonís fjölskyldunni, ákvað Sigurður að hefja líf Bonís fjölskyldunnar með því að þróa sæta veröld Bonís á svefntíma drengsins. Nafnið mótaðist sem sambland af franska orðinu Bonbon og Kandís, íslenska orðinu yfir kandísmola.
Upphafið var leirmynd sem var grundvölluð af höfði Felix, þegar hann var 6 mánaða gamall, 3 árum seinna kom annað Bonís barnið Miriam. Sigurður hannaði aðra leirmynd eftir henni. Síðan þá hefur Sigurður og fjölskylda skapað tugi mynda, tekið þátt í nokkrum listasýningum; hópfjármagnað framleiðslu á 300 Bonís bollum og sett upp vefverslun með hinum ýmsa Bonís varningi.

Hvað er framundan?
Þar sem þema Bonís eru sætindi þá fannst okkur rakið að gefa út sætinda uppskriftarbók. Skyr varð fyrir valinu sem aðal innihald vegna þess að það er eins íslenskt og matur gerist. Bókin er fyrir sælkera sem vilja sjá hvað hægt er að matreiða með skyri. Hún verður u.þ.b. 70 síður með tuttugu köku og sætinda uppskriftum ásamt því að vera með 10 þeytings uppskriftir. Allar uppskriftirnar eru skreyttar með myndum úr Bonís heiminum.