Nánari lýsing

Ég rita söguna mina í von um að hún geti vakið von innra með þeim sem hafa tapað henni og halda að eina lausnin sé að gefast upp.
Von um að það sé hægt að byggja sig upp að nýju og eignast betri líðan.
Ég trúi því að samfélagið okkar verði ríkara þegar einstaklingurinn nær endurreisn, endurreisn sem er byggð á verðugum og traustum grunni.

Sem ungur drengur bjó ég við hrottalegt heimilsiofbeldi sem herti hjarta mitt og tók það heljartaki. Ég var þess fullviss um að ég væri einskis virði, að ég ætti ekki skilið að vera elskaður, að engin myndi vilja mig sem kristallaðist svo í misnotkuninni sem ég varð fyrir sem ungur drengur. Ég lenti i einelti í skóla og lærði þar að leysa allan vanda með ofbeldi og ofríki sem átti eftir að hafa hræðilegar afleiðingar.

Í þessari bók fer ég yfir vegferð mína frá því að vera ungur drengur í hræðilegum aðstæðum yfir í að verða harðsvíraður glæpamaður, vændisdólgur og ofbeldismaður.

Árið 2007 tók líf mitt viðsnúning, þar sem ég breytti um stefnu og líf mitt tók háttaskiptum. Ég fór yfir í það að brenna fyrir því að hjálpa fólki.
Ég axlaði ábyrgð á gjörðum mínum, iðraðist og ákvað að helga líf mitt í að hjálpa öllum þeim sem höfðu glímt við erfiðleika og voru tilbúnir að þiggja hjálpina. Í dag er ég framkvæmdarstjóri hjá Lausnin fjölskyldu- og áfallamiðstöð sem og forstöðumaður í Catch The Fire Reykjavík.

Ég er giftur dásamlegri konu og saman eigum við á milli okkar átta börn og vinnum við saman að því að uppfylla hugsjón okkar um heilbrigt samfélag.
Ég skrifaði þessa bók með eigin orðum, hún er því hrá, ögrandi, ofbeldisfull, átakanleg, sorgleg, spaugileg og einnig full kærleika. Sagan mín lætur engan ósnortin.

Það er mín von að hún gefi fólki kraft til að vilja breytast og að fleiri sem hafa verið á sama stað vonleysis og ég fái tækifæri til endurreisnar.

Hjarta mitt er fullt af þakklæti yfir öllum þeim stuðningi sem ég hef fengið á þessari vegferð og mig langar að bjóða þér að taka þátt í henni.
Með því að kaupa bók í forsölu færðu hana afhenta þegar hún kemur úr 1. prentun, einnig getur þú styrkt verkefnið með öðrum hætti.

TAKK!
Takk fyrir mig!

Fylgstu með á instagram! Birtum daglega færslur úr bókinni