Further Information

DROPAR

Söngvarnir á plötunni DROPAR fundust fyrir tilviljun síðastliðið sumar í hljóðveri Vilhjálms Guðjónssonar en ég hef unnið mikið með honum undanfarna tvo áratugi með góðum árangri.

Á plötunni er að finna 12 söngva sem ég flyt einn með gítar og voru flest allir teknir upp þann 1 júlí 2010. Ég hef gjarna haft það til siðs þegar ég hef undirbúið plötur að taka upp tíu til tuttugu söngvaskissur í einni lotu og þá látið mér nægja eina töku á hvern söng með öllum mistökum sem slíkum vinnubrögðum fylgir. Ekkert lagfært eftir á. Síðan hef ég valið úr þessum skissum og fullunnið til útgáfu. Allt eftir markmiðum hvers verks. Einu verki lokið og tekist á við það næsta. Þetta þýðir að oft hafa afgangssöngvar jafnvel gleymst. En ekki í þessu tilfelli.

Undanfarin ár hef ég verið í uppgjöri við fortíð mína og verið að þrífa til í kringum mig og útskýra margt sem fólk vill vita og er forvitið um svo og ýmsilegt sem hefur ekki verið á hreinu enda hef ég alltaf lagt áherslu á málefnin hverju sinni en ekki á mig sem einstakling. Þessi plata DROPAR er hluti þessa uppgjörs og er 25 platan mín og um leið annar þáttur í röð verka minna um ævistarf mitt. Fyrst kom út bókin 75 sungnar sögur í 250 eintökum. Nú kemur platan DROPAR í 250 eintökum. Síðan stefni ég að því að skrifa bók um feril minn, aðferðir og verkefni og á hún að koma út í 250 eintökum næsta haust, 2021, sem endapunktur þessa uppgjörs.

Öll kallast svo þessi verk á við bækur mínar Tabú og Byltingu.

D R O

1. hlustaðu á mig 3:08:17
2. baráttusöngur 3:16:33
3. gjaldið 2:45:47
4. kuldi 3:54:00
5. valdið er okkar 3:00:49
6. hvað varðar mig um þig veröld? 3:04:30

P A R

7. venjulegur maður 4:13:32
8. þessvegna verð ég kyrr 3:17:34
9. landi minn 1:26:56
10. til hvers? 3:29:32
11. uppgjörið 3:51:38
12. nöldurskjóða 2:44:07

DROPAR verður aðeins seld í 250 vinyl eintökum.

Dropar koma úr framleiðslu í mars 2021
Afhending fer fram í Lucky Records, Rauðarstíg 10. Tilkynnt þegar platan kemur til landsins. Kaupendur utan höfuðborgarsvæðisins fá plötuna senda heim.
Dropar fara ekki á tónlistaveitur (Spotify)

Sumarið 1970 hljóðritaði ég mína fyrstu plötu „Hörður Torfason syngur eigin lög”. Það er mynd af henni hér fyrir neðan. Platan var gefin út af SG hljómplötum 24 mars 1971. Hún er oft kölluð fyrsta íslenska trúbadúraplatan. Hún var líka fyrsta íslenska víðóma platan (steríó). Þessi plata ruddi veginn fyrir þá sem vildu feta leið einfarans í tónlist.