Further Information

Um Heimaslátrun

Í ár eru 16 ár liðin frá útgáfu síðustu ljóðabókar minnar. Ekki löngu síðar skrifaði ég Heimaslátrun, langan ljóðabálk sem fjallar öðrum þræði um verkfræði dýraslátrunar. Bálkurinn endaði að ósekju ofan í skúffu en kemur nú út ásamt úrvali af ljóðum sem ég hef samið undanfarin ár.
Bókin er tvískipt. Annars vegar ljóðabálkurinn Heimaslátrun frá árinu 2006, handrit sem var tilbúið og meira að segja lesið yfir af vel völdum aðilum. Af einhverjum ástæðum leitaði handritið ofan í skúffuna, en Heimaslátrun hefur minnt reglulega á sig og nú er greinilega kominn tími á aðgerðir.

Hinn hluti bókarinnar er svo rjóminn af ljóðum sem hafa safnast upp hjá mér á blöðum, í bókum og ýmsum tölvuskjölum. Þótt 16 ár séu liðin frá síðustu ljóðabók hef ég aldrei hætt að skrifa ljóð. Þau eru og hafa alltaf verið minn fyrsti snertipunktur við tungumálið ... og sjálfan mig.
Heimaslátrun og aðrar vögguvísur er því blanda af gamalli tjáningu sem lét sér ekki segjast og nýlegri ljóðum sem vilja heyrast.

Hvað geri ég?

Eftir mig liggja þrjár ljóðabækur og smásagnasafnið Hlýtt og satt (2014). Árið 2008 gaf ég út menningargreiningarbókina Tvískinnu sem hefur verið kennd í ótal grunn- og framhaldsskólum landsins, nú síðast í Menntaskólanum á Akureyri og Verslunarskólanum í Reykjavík.
Þessa dagana legg ég lokahönd á skáldsögu um Guðrúnu á Bægisá og Djáknann á Myrká auk þess að skrifa nýja bók um skapandi skrif fyrir almenna lesendur og skúffuskáld. Fyrr á árinu hóf ég auk þess, ásamt tveimur öðrum, að undirbúa, skrifa og leikstýra heimildamynd um tónskáldið Jóhann Jóhannsson.