Nánari lýsing

Konur sem taka þátt í opinberri umræðu um kynbundið ofbeldi leggja mannorð sitt að veði. Öllum brögðum er beitt til að draga úr trúverðugleika þeirra, gera lítið úr frásögnum þeirra og upplifunum.

Ótal dæmi sýna að það hallar á friðhelgi kvenna og jaðarsettra hópa í íslensku réttarkerfi, þar sem kærur um ofbeldi og nauðganir eru látnar niður falla og þeir fáu dómar sem falla eru vægir og oft skilorðsbundnir.

Konur sem neita að láta slíkt yfir sig ganga og tjá sig um órettlætið sem viðgengst eiga á hættu á að vera kærðar fyrir meiðyrði og dæmdar til skaðabóta. Þannig er mikilvæg gagnrýni á kerfið og fordæmd sem lögleysa og látið sem “dómstóll götunnar” vilji hrifsa til sín völd. Það er mikilvægt að þær sem tala um reynslu sína eða styðja þolendur séu ekki þaggaðar niður með þessum máta.

Stofnun málfrelsissjóðs er ætlað að draga úr ótta kvenna við að tjá sig og tryggja að fjárhagsáhyggjur bætist ekki við það andlega og tilfinningalega álag sem fylgir því að tala um kynbundið ofbeldi. Markmiðið er að sjóðurinn muni geta staðið undir málsvarnarlaunum og mögulegum skaðabótum sem konur kunna að verða dæmdar til að greiða vegna umræðna um kynbundið ofbeldi og nauðgunarmenningu.

Með því að taka þátt og leggja þitt af mörkum í málfrelsissjóðinn styður þú baráttuna gegn kynbundnu ofbeldi og tekur þátt í að byggja upp samstöðu með þolendum og þeim sem tala fyrir þeirra hönd á opinberum vettvangi. Þannig eykst vonin um að réttarkerfið neyðist til að endurskoða hvernig tekið er á málum sem varða ofbeldi og nauðganir.