Further Information

"Ég skildi að gæfan gefur engum neitt, sem gætir ekki vel að lífi sínu" . Þessar línur úr ljóði Lenu Gunnlaugsdóttur vinkonu minnar, voru kveikjan að því að ég fór að semja lög. Seinna eftir að hafa samið nokkur lög við ljóð, kom í ljós að flest ljóðanna voru eftir konur. Það varð til þess að árið 2015 hélt ég, ásamt kvenarmi Sinfóníuhljómsveitar Norðurlands, tónleikana "Kristjana og konur" sem haldnir voru í Hofi á Akureyri. Örn Eldjárn Kristjánsson sá um útsetningar fyrir hljómsveit. Eftir það hef ég, ásamt Erni og Jóni Rafnssyni flutt þessi lög mín, m.a í tónleikaröðinni "Gestaboð Kristjönu". Nú kæru vinir er kominn tími til að gefa þessi lög út á plötu, fyrir ykkur að njóta.

Fyrir þá sem ekki þekkja til mín, þá hófst söngferill minn fyrir um 30 árum, þar sem ég söng ásamt félögum mínum í Tjarnarkvartettinum. Við vorum starfandi á árunum 1989-1999 og gáfum út 4 hljómdiska og sungum víða um völl, hérlendis og erlendis.

Sólóferill minn hófst árið 2000, með útgáfu á minni fyrstu sólóplötu, "Þvílík er ástin". Síðan þá hef ég gefið út 3 diska, "Í húminu" (2005), "Tangó fyrir lífið" (2012) og jóladiskinn "Stjarnanna fjöld" (2018).

Fimmta plata mín, sem nú er í smíðum, inniheldur 12 frumsamin lög. Þau eru samin við við ljóð m.a. Lenu Gunnlaugsdóttur, Jakobínu Sigurðardóttur, Elísabetar Geirmundsdóttur, Höllu Eyjólfsdóttur og Davíðs Stefánssonar. Einnig á ég tvo frumsamda texta. Upptökur er nú þegar hafnar og þann 16. mars síðastliðinn, þegar ég fagnaði sextíu ára afmæli mínu, kom út fyrsta lagið á plötunni, sem nefnist "Konan með sjalið" við ljóð Davíðs Stefánssonar. Við stefnum á að gefa plötuna út á geisladisk í haust.

Örn Eldjárn er listrænn stjórnandi og sér um útsetningar og upptökur, Arnar Guðjónsson sér um hljóðblöndun og Styrmir Hauksson um tónjöfnun (master).

Kæru vinir, það eru viðsjáverðir tímar og skrítnir sem við öll erum að ganga í gegnum, en í öllu þessu fári þá er gott að eiga tónlistina að, sem sefar, gleður og græðir.
Því langar mig að biðja ykkur um að aðstoða mig einmitt núna við að láta þennan draum minn verða að veruleika.

Með fyrirfram þökk
Kristjana