Further Information

KYNNING:
Hæ þið öll og takk fyrir að heimsækja styrktarsíðuna mína hér á Karolina Fund. Mig langar að segja ykkur aðeins frá því sem drífur mig áfram í að gera þessa plötu. Við vitum jú öll að landslagið í plötuútgáfu er virkilega breytt með tilkomu Spotify og Youtube til dæmis og það kannski borgar sig ekki beint að gefa út plötu. En þrátt fyrir það allt þá er það nú svo að mig langar að hafa lögin saman í einni heild og Karolina Fund hjálpar til við að láta þennan draum minn rætast, að gera þessa plötu. Þemað er skýrt en það er ást, von og ylur. Tónlist er nefnilega svo máttug og getur farið með mann í tilfinningarússíbana, upp, niður, út og suður en mig langar að tónlistin á þessari plötu kveiki fallegar og hlýjar tilfinningar hjá hlustandanum.

NÁNAR UM PLÖTUNA:
Á plötunni verða áður útkomin og þekkt lög, í nýjum útsetningum, eftir nokkra af mínum uppáhalds íslensku laga- og textahöfundum ásamt nokkrum eftir mig. Útsetningar og upptökustjórn verður í höndum Snorra Snorrasonar, Helgi Hannesar spilar á píanó, Pétur Valgarð á gítar, Ólafur Þór Kristjánsson á bassa og trommurnar lemur Benni Brynleifs. Hönnun umslags gerir svo listakonan Ynja Mist. Fyrsta lagið sem fær að hljóma af plötunni er hið fallega lag KK, Kærleikur og tími, en útsetningin sem Snorri gerði af þessu lagi sýnir vel hljóðheiminn sem platan mun geyma.

UM MIG:
Ég hef sungið frá blautu barnsbeini og stefndi alltaf að því að gera tónlistina að starfi mínu og eftir að hafa lent í öðru sæti í Idolstjörnuleit árið 2005 rættist sá draumur. Ég útskrifaðist svo sem leikkona frá Circle In The Square Theater School í New York sumarið 2009. Áður en ég hóf nám í leiklist hafði ég verið í tónlistarskóla í mörg ár og einnig lært söng í Söngskólanum í Reykjavík og lokið eins árs masterclass frá Complete Vocal Institute í Danmörku. Á fjölbreyttum ferli hef ég sungið við hin ýmsu tækifæri ásamt því að hafa tekið þátt í ýmsum söngleikjum, þar á meðal Sögunni af Nínu og Geira á Broadway, Footloose í Borgarleikhúsinu, Buddy Holly í Austurbæ og Vesalingunum í Þjóðleikhúsinu. Fyrsta sólóplatan mín kom út árið 2005 þannig að það er löngu kominn tími á nýja. Ég var síðan útvarpskona á Rás 2 frá 2008-2018 en starfa núna með tónlistinni sem flugfreyja hjá Icelandair.

FYRSTA SMÁSKÍFAN:
Fyrsta lagið sem heyrist af plötunni er fallega lagið hans KK, kærleikur og tími, en hljóðheimur lagsins lýsir glöggt hljóðheiminum sem verður á plötunni.