Further Information

Ég heiti Hrund Hlöðversdóttir og er grunnskólakennari og skólastjórnandi. Frá því að ég var lítil hef ég átt þann draum að skrifa bók og nú er komið að því að láta drauminn rætast.

Til að draumur minn verði að veruleika langar mig, með verkefninu hér á Karolina-fund, að safna áheitum og selja bókina í forsölu. Þeir sem taka þátt geta eignast eintak á góðu verði og ég næ að gefa bókina mína út.

Hugmyndin að bókinni kviknaði fyrir sjö árum síðan eða haustið 2014. Þá gekk ég ásamt nemendum og starfsfólki Hrafnagilsskóla upp að Hraunsvatni í Öxnadal. Við vatnið er heill ævintýraheimur og mikil náttúrufegurð þar sem Hraundrangarnir tróna yfir manni, tignarlegir og ægifagrir.

Ég var uppnumin af þessum ævintýrastað. Á þessum tíma hafði ég verið að kynna mér þjóðsögur og lesið um álfa, huldufólk, skrímsli og aðrar kynjaskepnur.

Eftir ferðina að Hraunsvatni fékk ég þá hugmynd að skrifa ungmennabók sem gerðist í þessu ævintýralega umhverfi. Mig langaði til að nýta þjóðsagnaarfinn, ævintýraheiminn sem hefur gengið mann fram af manni og tengja hann venjulegu fólki í raunheimum.

Ég skrifaði bókina með hléum í tvö ár. Síðan þá hef ég endurskrifað hana margoft og breytt eftir ábendingum fólks sem hefur verið svo elskulegt að lesa bókina og gefa mér ráðleggingar. Fyrir það er ég þakklát og ég er ótrúlega spennt að ævintýrið sé að verða að veruleika. Bókin mín fær að öðlast eigið líf meðal lesenda.

Ég hef fengið frábært fólk í lið með mér við útgáfu bókarinnar. Guðjón Ingi Eiríksson, útgefandi í bókaútgáfunni Hólum, og hans fólk er að vinna að útgáfunni fyrir mig. Íris Auður Jónsdóttir, listamaður, málaði myndina á bókakápuna og hún og börnin hennar, Emil Logi Heimisson og Agnes Lóa Heimisdóttir teiknuðu myndir í bókina. Fjölskyldan mín hefur stutt mig og aðstoðað, maðurinn minn, Sigmar Örn og börnin , Erna Sól og Heiðmar Örn hafa hvatt mig og aðstoðað í gegnum allt ferlið.

Bókin fjallar um Svandísi sem er fjórtán ára stelpa sem flytur úr borginni norður í land. Þar eignast hún vinina Brján og Sylvíu en saknar vinkonu sinnar Láru og getur ekki beðið eftir að hún komi í heimsókn í jólafríinu. Í kringum Svandísi er margt einkennilegt á kreiki. Köttur með rauð augu, dularfullir hestar og fólk sem ef til vill er annað en það sýnist vera. Hún flækist inn í baráttu góðs og ills, kynnist ástinni og þarf ásamt vinum sínum að glíma við ógurlegar kynjaskepnur.

Bókin er þessa dagana í síðasta yfirlestrinum, síðan fer hún í umbrot og að lokum í prentun. Ég á von á því að ferlinu ljúki um miðjan október og þá verði hún tilbúin. Þeir sem kaupa bók í forsölu geta fengið hana senda heim til sín.