Further Information

Kæri lesandi

Fjóla Sigríður heiti ég og er með hugmynd af bók sem mig langar að gefa út. Mamma mín heitin, Aðalbjörg Vagnsdóttir eða Abba eins og allir kölluðu hana, var sjálflærður kokkur af guðs náð. Hún glímdi við mjög mikil veikindi (krabbamein), og lést þann 28. október síðastliðin. Hún skildi eftir sig rosalegan uppskrifta fjársjóð, uppskriftir sem hún handskrifaði í stílabók, setti í plastvasa og í möppu. Hún átti margar uppskriftir sjálf sem hún bjó til frá grunni og allir elskuðu þær. Hún átti sinn draum að gefa út bók en því miður gafst ekki kraftur eða tími í það fyrir hana. Mig langar að heiðra minningu hennar með því að safna saman uppskriftum sem hún gerði í gegnum tíðina og gefa út bók. Hugmyndin mín af er þó svolítið frábrugðin hefðbundnum uppskriftabókum að því leyti að ég mun um leið segja frá því hvernig hún komst í gegnum alla sína erfiðleika og veikindi einmitt með því að meðal annars matreiða og baka, svo þetta yrði uppskriftabók en um leið líka sagan hennar. Það er mjög margt sem mig langar að deila með ykkur í þessari bók um hennar matreiðslu og venjur. Hluti ágóðans af sölu bókarinnar yrði til styrktar Lyflækningadeild Akureyrar, því þar var mamma mín síðustu ár meira og minna og margar hugmyndir komu upp hjá henni á meðan hún var þar í lyfjameðferð. Allir hennar réttir eiga sér sögu og ég veit að bókin myndi stytta mörgum stundirnar því mamma var mikill húmoristi. Áður en ég get haldið áfram með hugmyndina mína langaði mig að vita hvort þetta myndi heilla þig. Ég þarf þinn stuðning til þess að geta gefið út bókina, og þess vegna stofnaði ég þessa styrktarsíðu. Ég ætla mér að skila þessu verkefni vel af mér og leggja allt í það að gera þessa bók fallega og sérstaka. Drauma útgáfudagur er 21 Nóvember næstkomandi því mamma hefði fagnað 70 Ára afmælinu sínu.