Further Information

Bókin

Bókin verður mín fyrsta bók en bókin mun innihalda 40 myndir af íslenskum konum ásamt fræðsluefni um líkamsímynd kvenna. Konurnar verða ljósmyndaðar á nærfötunum og eru konurnar af öllum stærðum og gerðum. Þær eru meðal annars með stóma poka, óléttar, hafa misst útlim, nýbúnar að eignast börn, grannvaxnar, konur í góðum holdum og sterkbyggðar konur.

Hugmyndin af bókinni fékk ég útfrá umræðu sem ég setti af stað á Instagram. Þar deildi ég skoðun minni á afhverju konur gætu ekki birt af sér kynþokkafulla mynd án þess að vera kallaðar "athyglisjúkar druslur". Yfir fimm hundruð manns birtu myndir af sér fáklæddum á Instagram eftir að ég steig fram með þessa umræðu og sýnir það hversu mikil þörf er á þessari umræðu.

Verkefnið og markmið

Markmið bókarinnar er að sýna að kynþokki er allavega og við ættum ekki að vera hræddar við að sýna hann eða hreinlega við það að vera kynþokkafullar, það gerir okkur ekkert minna klárar eða minna sterkar. Sjálf er ég með mastersgráðu í fjármálum og vil ég að konurnar í bókinni sýni það að þú getur verið framakona og samt birt kynþokkafulla mynd af þér. Fjöldi þeirra sem tóku þátt í þessari umræðu með mér á Instagram sýnir fram á gífurlega þörf fyrir fræðslu á þessu málefni.

Notkun insternetsins fer sífellt vaxandi meðal ungmenna og pressan á útliti virðist vera mikil. Samfélagsmiðlar og fjölmiðlar stuðla oft að óheilbriðgri líkamsímynd með því meðal annars að sýna að langmestu leyti konur sem eru grennri heldur en eðlilegt þykir og sýna einstaklinga í yfirvigt í neikvæðu ljósi jafnvel þannig að þeir virðast misheppnaðir og eigi til að mynda erfitt með rómantísk samskipti.

Ég vil að þessi bók fræði meðal annars ungmenni og varpi ljósi á hvað sé eðlilegt og að allt sé fallegt. Þar sem fegurðarstaðallinn virðist sífellt verða óljósari og lúmskari, fara konur ómeðvitað að miða sig við þessa óraunhæfu staðla. Bókin á að sýna að engin er með eins líkama og það skiptir máli að læra að elska hann í því formi sem hann er.

Höfundur

Ég heiti Edda Falak og er 29 ára íþróttakona, næringarþjálfari og fjármálafræðingur. Ég hef varið miklum tíma síðastliðin ár í að valdefla konur og láta gott af mér leiða, meðal annars í gegnum Instagram og í hlaðvarpi sem ég er með sem heitir EIGIN KONUR. Þessi bók verður mín fyrsta bók, sem ég stefni á að gefa út á eigin vegum. Þessi bók er mjög nálægt hjarta mínu og framþróun þess virkilega mikivæg þar sem að tilgangur bókarinnar er að þjóna sem fræðsla og kynning á mjög verðugu málefni.

Þar sem ég hef enga bakhjarla til að styðja mig í verkefninu hef ég ákveðið að leita á Karolina Fund eftir stuðningi ykkar. Markmiðið er að safna 10.000 evrum sem verða nýttar til að greiða fyrir umbrot, prentun, bókaskrif, myndatöku, yfirlestur, útgáfu og dreifingu.