Further Information

Ég læri að lesa er flokkur lestrarhefta sem þjálfar undirstöðuatriði lesturs.

Flokkurinn inniheldur fjögur mismunandi hefti sem leggja áherslu á hljóð bókstafanna, að kenna börnum að tengja saman tvö hljóð, kenna þeim að lesa stutt orð og stuttar setningar, ásamt því að vinna með orðaforða. Í heftinu eru textar til að lesa og verkefni til að vinna samhliða lestrinum.

Lestrarheftin henta vel sem allra fyrstu lestrarbækur, og því tilvalið fyrir bæði kennara og foreldra að tryggja sér eintök!

Hugmyndafræðin á bakvið uppsetninguna er sú að börn læra að allir bókstafir eiga sín hljóð, og orð eru sett saman úr hljóðum bókstafanna. Nemendur tengja hljóðin bæði við orð og myndir af hlutum sem þau þekkja úr sínu eigin umhverfi.

Röð bókstafanna í heftunum er sú sama og oft er notuð þegar stafainnlögn fer fram í grunnskólum. Bókstafirnir eru því ekki kynntir í stafrófsröð, heldur í röð sem auðveldar orðamyndun. Orðin í textanum eru einungis sett saman af þeim bókstöfum sem hafa verið formlega kynntir í heftinu, t.d. kemur orðið kál ekki fyrir í textanum fyrr en búið er að kynna K – Á – L, sama má segja um orðið lax, sem birtist ekki fyrr en búið er að kynna L – A – X. Lagðir eru inn tveir til fjórir bókstafir í einu, næst kemur verkefnablað með orðasúpu og eyðufyllingum, þar skrifa nemendur orð og einnig eru stuttar æfingar sem þjálfa hljóðkerfisvitund.

Það er leyfilegt að ljósrita verkefnasíðurnar ef heftin er ekki hugsuð sem einkaeign hvers nemanda.

--

Höfundur bókanna er Hlín Magnúsdóttir, deildarstjóri stoðþjónustu í leik- og grunnskólanum Helgafellsskóla. Að auki heldur hún úti námssamfélaginu Fjölbreyttar kennsluaðferðir fyrir fjöruga krakka. Einnig hefur hún ferðast um landið og haldið fyrirlestra fyrir foreldra, kennara og annað fagfólk um mikilvægi þess að hafa fjölbreytni í skólastarfinu og hvernig hægt er að vinna með nemendum á þeirra hraða og með áhugasvið þeirra að leiðarljósi.

Bækurnar er afurð vinnu hennar með börnum með lestrarvanda. Þegar hún var að kenna lestur tók hún eftir því að oft á tíðum, þegar nemendur lásu hljóðaklasa þá tengdu þeir hljóðið við hlut sem þeir þekktu. Þarna kviknaði sú hugmynd að búa til lestrarhefti þar sem hljóðaklasarnir voru alltaf tengdir við mynd til að hjálpa nemendum að tengja hljóðið við orð sem þeir þekktu fyrir.

LÍ - LÍ - LÍ - eins og lím!