Further Information

Uppfært:

Þökkum ómetanlegan stuðning! Við höfum náð að fjármagna upphaflegt markmið (40 spjaldtölvur af ódýrustu gerð). Nú prófum við að stefna á 250% og getum þá einnig gefið spjaldtölvur á Vífilstaði og keypt heyrnatól. Þúsund þakkir!

Söfnun fyrir spjaldtölvum á öldrunarlækningadeildir Landakots.

Á Landakoti fer fram endurhæfing aldraðra eftir alvarleg veikindi. Fjölfaglegt samstarf lækna, hjúkrunarfræðinga, sjúkraliða, almenns starfsfólks, iðjuþjálfa, sjúkraþjálfara, næringarfræðinga, sálfræðinga og félagsráðgjafa sem styðja í heildrænni meðferð sjúklinga.

Á tímum Covid-19 sýkingarinnar er endurhæfing takmörkuð við hreyfingu og virkni á herbergi eða á deild. Mikil áhersla er á sýkingavarnir og er erfitt að finna verkefni við hæfi með þeim úrræðum sem eru til staðar.

Á Landakoti eru nú heimsóknir óheimilar. Sjúklingar hafa því miður ekki sjónvarp við sitt rúm til að geta horft á og margir hverjir ekki góðir með litlu símana. Við teljum spjaldtölvur geta hjálpað til við að rjúfa einangrun með möguleika á spjalli og að geta séð sína nánustu, horft á sjónvarp/myndbönd, hlustað á hlaðvörp, verið í sudoku og ýmislegt fleira.

Staðan er fordæmalaus og við erum að leita leiða til að hjálpa sjúklingunum til að hafa eitthvað við að vera. Nánari upplýsingar er hægt að fá hjá Helgu Atladóttur deildastjóra L2 og forsprakka söfnunarinnar, í síma 824-5103.