Further Information

Red Barnett

Red Barnett byrjaði sem sólóverkefni Haraldar V. Sveinbjörnssonar og á rætur að rekja til námsára hans í Lundi í Svíþjóð 2002-2004 þegar hann lagði stund á nám í tónsmíðum við Tónlistarháskólann í Malmö.

Fyrsta plata Red Barnett, Shine, kom ekki út fyrr en vorið 2015. Platan hlaut frábærar viðtökur þó ekki hafi hún selst í bílförmum. Hún innihélt lagasmíðar Halla frá 10 ára tímabili og endaði loks sem plata ársins 2015 í opnum flokki á Íslensku tónlistarverðlaununum ári síðar.

Eftir þá velgengni lá í loftinu að það yrði að fylgja frumsmíðinni eftir. Lagasmíðarnar hrúguðust upp og loks er kominn tími til að hleypa þeim út í kosmósið.

Hljómsveit og ný plata

Fljótlega eftir útgáfu Shine var sett saman hljómsveit til að fylgja plötunni eftir.

Sú sveit var skipuð þeim Hannesi Friðbjarnarsyni á trommur, Finni Beck á bassa og Didda Guðnasyni á slagverk en allir höfðu þeir komið við sögu á upptökum á Shine. Auk þeirra voru í hópnum þeir Ásgeir Ásgeirsson gítarleikari og Daði Birgisson hljómborðsleikari.

Red Barnett á útgáfutónleikum í Fríkirkjunni Reykjavík 17.apríl 2015

Mikil og góð stemning myndaðist innan þessa hóps og var brugðið á það ráð að allir myndu koma saman til að spila inn á næstu plötu.

Sem fyrr voru lagasmíðar í höndum Halla en hljómsveitin sameinaðist í að útsetja flest laganna.

Tekið upp í Rockfield Studios í Wales

Hljómsveitin fyrir utan Quadrangle hljóðverið í Rockfield.
Frá vinstri: Finnur Beck, Halli, Diddi Guðnason, Ásgeir Ásgeirsson, Hannes Friðbjarnarson og Daði Birgisson.

Grunnurinn að plötunni er að mestum hluta tekinn upp "live" í Quadrangle hluta hins sögufræga Rockfield hljóðvers í Wales. Hljómsveitin var viku í þessu frábæra stúdíói í byrjun júní 2018. Við fengum með okkur hinn fjölhæfa Silla Geirdal úr Dimmu til að hafa yfirumsjón með upptökum. Auk hans var hljóðmaðurinn og heimamaðurinn Joe Jones okkur til halds og trausts.

Í Rockfield Studios hafa margir af helstu stórstjörnum tónlistarbransans tekið upp sínar plötur. Má af þeim nefna Black Sabbath, Pixies, Oasis, Coldplay, Suede, The Cure, Supergrass, Iggy Pop, Robert Plant, Royal Blood, Judas Priest, Mike Oldfield, Mötorhead, The Stone Roses, The Cult og The Stranglers ... og svo mætti lengi telja.

Frægast er þó Quadrangle-stúdíóið fyrir það að þar lögðu Queen grunninn að Bohemian Rhapsody.

Upptökurnar heppnuðust frábærlega enda innblásnar af þessari miklu sögu hljóðversins og stemningarinnar í kringum það.

Halli í Rockfield hljóðverinu júní 2018.

Lokahnykkur og vínyll

Síðan upptökur fóru fram í Rockfield hljóðverinu hefur Halli verið að fínpússa upptökur og efnivið meðfram öðrum verkefnum. Meðal annars hefur kammerkórinn Hljómeyki sungið inn á þrjú laganna á plötunni. Myndlistarmaðurinn Hans Alan vinnur nú útlit og umslag Astronauts.

Tónlistin á Astronauts er örlítið rokkaðri en á fyrstu plötu Red Barnett. Ljóð laganna eru mörg hver um hvernig við upplifum okkur einmana þrátt fyrir að búa í hinni sítengdu samfélagsmiðlaveröld 21.aldarinnar. Halli fékk söngvaskáldin Ragnar Ólafsson úr Árstíðum og hina færeysku Lenu Anderssen til liðs við sig í textasmíð fyrir plötuna.

Kammerkórinn Hljómeyki við upptökur í Hljóðrita í sumar.

Red Barnett leitar nú til ykkar að klára plötuna með pompi og prakt. Grunnupptökum er lokið - en nú þarf að fullklára söngtökur og aukahljóðfæri, ganga frá hljóðblöndun og hljóðjöfnun, hanna umslag, framleiða ofl. ofl.

Gamall draumur er að gefa tónlistina út á vínyl og það er eitthvað sem okkur langar að framkvæma að þessu sinni. Við vonum að þátttaka ykkar í verkefninu verði okkar loka gæfuspor í þessari vegferð. Takk!