Ný íslensk sjómannalög
Stórleikarinn og söngvarinn Jóhann Sigurðarson hélt tónleika í Salnum Kópavogi þann 10. nóvember á síðasta ári. Tónleikarnir voru haldnir til heiðurs hinni íslensku sjómannalagadægurlagahefð, en eins og allir vita hafa sjómannalög verið vinsæl á Íslandi í gegnum tíðina og lifa margar perlur með þjóðinni. Með Jóhanni spilaði hljómsveit skipuð þeim Friðriki Sturlusyni á bassa, Ástvaldi Traustasyni á píanó og harmonikku, Karli Olgeirssyni á hammond og píanó, Matthíasi Stefánssyni á kassagítar, mandolín og fiðlu, Pétri Valgarði Péturssyni á rafgítar, Magnúsi Magnússyni á trommur og Jens Hanssyni á saxófón. Einnig söng kvartett með í nokkrum lögum og Egill Ólafsson var sérstakur heiðursgestur.
Jóhann söng úrval af þessum gömlu sígrænu sjómannalögum á tónleikunum, en einnig frumflutti hann nokkur spunkuný, en þau lög voru samt höfð í anda þeirra gömlu. Nýju lögin eru meðal annars eftir Gunnar Þórðarson og Guðmund Jónsson, en allir textarnir eru eftir Friðrik Sturluson. Tónleikarnir voru teknir upp og tókst vel til að öllu leyti. Viðtökur voru framar vonum og nú hefur verið ákveðið að gefa hluta af þessum tónleikum út á geisladiski.
Allir vita stöðuna á útgáfumálum í dag, en aðstandendur verkefnisins telja að þessi tónlist eigi erindi og að það sé nauðsynlegt að koma henni á fast form og tryggja þannig sess laganna með öðrum lögum af sama meiði í þjóðararfinum. Upptökum er sem sagt lokið, en lokafrágangur og framleiðsla er eftir. Því vantar herslumuninn til að koma þessu út og því er leitað eftir stuðningi. Ekki vantar mikið uppá og er óskað eftir lágmarks framlagi til að klára þetta. Það er hljóðblöndun og framleiðsla sem þarf að klára og kosta.
Karolina Fund ehf © 2024 | Kt: 460712-1570 | VAT: 111464