Further Information

Bókin That's Why We Don't Eat Animals eftir Ruby Roth kom út árið 2009 og er fyrsta barnabókin sem kemur út um þetta málefni. Bókin fjallar um dýr og veganisma og höfðar til barna á aldrinum 6 til 10 ára. Í bókinni sýnir Ruby dýrin í eðlislægum aðstæðum náttúrunnar þar sem þau leika sér og verja tíma með fjölskyldum sínum. Bókin sýnir líka dýrin í grimmilegum aðstæðum verksmiðjubúskapar. Á einfaldan hátt, svo ekki verður um villst, er lesendum gert ljóst hvort er betra fyrir dýrin. Einnig er komið inn á umhverfisáhrif dýraframleiðslu. Myndskreytingar Ruby eru skemmtilegar og áhrifaríkar og ná til bæði barna sem og fullorðinna.

Það er orðið tímabært að fá bók sem þessa í íslenskri þýðingu sem lýsir hvað dýr í búskap þurfa að þola á eins heiðarlegan hátt og mögulegt er í bók sem höfðar til barna. Í gegnum reynslu sína af bókinni, og starfi sínu með börnum, segir höfundurinn að börn geti vel tekið til sín upplýsingarnar sem eru settar þar fram og myndað sér skoðun um hvað er rétt og rangt í meðferð okkar á dýrum.

Við hvetjum alla sem hafa hug og kost á að styrkja þetta verkefni og stuðla þannig að bættri framtíð dýra og manna.