Further Information

Þetta er kápumyndin á bókinni. Vel má sjá hundstrýni eða tófu koma út úr snjókófi eða bara eitthvað allt annað sem fólki finnst.

Efnisyfirlit bókarinnar. Allar hafa sögurnar einhvern boðskap fyrir litlar sálir sem er auðvelt að skilja.

Sögurnar eru myndskreyttar með abstraktmyndum í þeim tilgangi að litlar sálir geti látið hugmyndaflugið ráða og finna út hvar hundarnir halda sig, köngulærnar eða bara eitthvað allt annað.

Þessi mynd var tekin af Ástríði Rán þegar hún æfði sig fyrir stóru upplestrarkeppnina grunnskólanna á 50. afmæli mínu. Hún var valin fyrir Víðistaðaskóla til að taka þátt í þeirri keppni og var ófeimin við að lesa upp fyrir tugi gesta.

Upphaf þessara sagna má rekja til þess að ég, höfundurinn, var að skálda sögur fyrir dótturdóttur mína þegar ég var að mata hana, svæfa eða bara að segja sögur eða brandara þegar hún var lítil stelpa. Hún var fædd 1992 og við bjuggum í Mosfellsbæ. Sögurnar eru allar um tvo hunda sem Ástríður þekkti og áttu heima á Kjalarnesi. Týri á Völlum og Bimbó á Melum. Smátt og smátt urðu sögurnar fleiri og fleiri og er bókin safn sagna sem geymst hafa en ég byrjaði að skrá þær niður í kringum árin 2001/2002. Sögurnar þroskuðust auðvitað eftir því sem Ástríður eltist og eru þær því fyrir aldurinn 3/4 ára til 8/9 ára, jafnvel eldri. Eftir að sögurnar urðu til kom í ljós að ævinlega var einhver boðskapur í hverri sögu sem mér varð ekki ljós fyrr en síðar.

Þetta eru 16 sögur þar sem hundarnir lenda í alls konar ævintýrum og eru nánast mannlegir. Tófan Snúra og kötturinn Apakötturinn koma líka við sögu.
Sem dæmi éta hundarnir súkkulaði sem Lilja á Völlum kemur með heim frá útlöndum og lenda svo báðir hjá lækni vegna magakveisu. Bimbó kúkar í bílsætið hjá bílstjóranum sem hirti hann fárveikan upp af veginum þegar Bimbó var á leiðinni heim til sín að Melum.
Þeir klippa neðan af skálmum og ermum á sparifötunum hans Óla á Melum til að fara á ball og eru svo í ljótum málum á eftir.
Þeir hita matinn handa hænunum á Melum og Týri brennir sig og þeir eru enn og aftur í ljótum málum.
Þeir reyna að veiða mýs og fá Apaköttin til að kenna sér það.
Týri kynnist tófunni Snúru sem býr uppi á Esjunni og verður skotinn í henni.
Þeir lenda í óveðri og ýmislegt annað kemur fyrir hjá þeim.

Ástríður hafði stóra drauma um framtíð sína en hún var afskaplega skemmtileg og einstök manneskja. Hún fór fyrst að fikta við ávanalyf og fíkniefni uppúr 12-13 ára aldri. Hún var í eitt ár á Árbót við Húsavík þegar hún var í 10. bekk og eftir það að hluta á öðru heimili þar sem hún höndlaði ekki lífið í Reykjavík með öllum þeim freistingum sem þar voru í boði.

Ástríður var ekki í mikilli neyslu fyrstu unglingsárin þar sem henni var haldið frá þeim. Hún kynntist yndislegum manni sem hún stofnaði heimili með og eignaðist dreng í desember 2010. Frá haustinu 2011 fór að síga á ógæfuhliðina og átti hún bæði slæma og góða spretti eftir það.

Þau úrræði sem Ástríði buðust eftir Vog og Vík voru engin sem skiptu máli. Áfangaheimili eru ekki í stakk búin til að halda utan um unglinga 18+ sem eru komin á þennan stað í lífinu. Þá er heldur ekki hægt að ætlast til að fjölskylda eða foreldrar séu stuðnings- eða meðferðaraðilar. Því verður að vekja máls á aðstöðuleysi og úrræðaleysi sem þessi málaflokkur geldur og reyna að leggja sitt á vogaskálarnar.
Ástríður svipti sig lífi á Vogi 12. september 2014. Sonur hennar býr við gott atlæti hjá föður sínum og er með stórt og gott stuðningsnet í kringum sig.

Bók þessi var gefin út á 25 ára afmælisdegi Ástríðar, sem var 31. júlí 2017, og er tilgangur hennar að styðja og styrkja samtök sem vinna að því að koma ungu fólki á réttu brautina aftur. Fer allur ágóði af sölunni í það verkefni. Sem dæmi má nefna Píetahús, Krísuvíkursamtökin og Nýja Dögun.

Í dag er um 1/3 hluti bókanna seldur en til að geta lagt til styrk sem hefur eitthvað að segja þarf að selja allt upplagið en eftir eru um 600 bækur. Hagkaup, Mál og menning og Bókarkaffi á Selfossi styrkja málefnið með því að selja bókina án álagningar.

Styðjir þú verkefnið styður þú gott málefni.

Ég er með facebook síðu undir Týri og Bimbó þar sem má fylgjast með helstu upplýsingum og því sem er að gerast.