Further Information

Hér er á ferðinni bók, sem lýsir uppvexti mínum á 6. - 7. áratug síðustu aldar og fram til dagsins í dag. Bókin er skrifuð í bréfastíl þar sem ég ávarpa barnabarn mitt og nöfnu. Ég lýsi uppvaxtarárum mínum, aðstæðum og kjörum. Við lýsinguna styðst ég við gögn opinberra yfirvalda s.s. barnaverndarskýrslur. Aðstæður og kjör mín einkenndust af fátækt ofbeldi og misrétti. Ég lýsi baráttu minni á fullorðinsaldri við þögn og skömm vegna aðstæðna og atburða sem ég bar ekki ábyrgð á. Sagan fjallar ekki síst um baráttuna við að skila skömmunni og axla þá ábyrgð sem reynslan fól mér. Þar á meðal þeirri ábyrgð að standa með bróður mínum, frægum að endemum, útigangs- og síafbrotamanninum Lalla Johns. En sú glíma leiddi svo til þess að ég ásamt fleirum opnuðu á vitneskju og opinbera umræðu um Breiðavíkurmálið, sem skók íslenskt samfélag. En Lalli bróðir minn var vistaður þar í fimm ár. Í kjölfar þessarar umfjöllunar og opinberunar á aðstæðum drengja sem vistaðir voru á Breiðuvík fór Lalli í meðferð og hefur ekki nú ellefu árum eftir þessa umfjöllun, gerst sekur um afbrot né setið í fangelsi.

Sagan er þroskasaga mín og lýsir glímu minni við Guð, menn og sjálfa mig. Sagan lýsir einnig göngu minni í gegnum lífið sem einstæðri móður og baráttu minni og þrá eftir að veita börnum mínum betra líf en ég átti sjálf.

Sagan lýsir ferli valdeflingar frá vanmætti og skömm til hugrekkis og sigurs. Ég tek mér í munn viðbrögð sonar míns eftir lestur handritsins:" Mjög gott efni... vel skrifað en samt glettið....... sagan snerti mig mjög mikið".