Further Information

Upp upp mín sál - og mitt hjarta, milta, nýru, lungu og lifur með geymir mörg af mínum fallegustu lögum. Hún skiptist í tvo hluta. Á fyrri helmingi plötunnar er framhaldssagan Ferðalagið, sem segir frá manni sem leggur upp í ferðalag, leit að konu sem hvergi er til nema í huga hans sjálfs. Myndbandið efst á síðunni er lag númer 2 í Ferðalaginu. Seinni hluti plötunnar eru síðan lög sem fara í allar áttir. Platan var unnin í góðu samstarfi við tónlistarmennina Róbert Örn Hjálmtýsson og Valgeir Gestsson og það er þeim að þakka hversu vel heppnuð hún er. Sálin vill komast í efnislegt form seinnihluta septembermánaðar (geisladiskur) og því er efnt til þessarar söfnunar.

Ég hef verið afkastamikill við laga og textasmíðar í gegnum tíðina, starfa við það að rjúfa félagslega einangrun fatlaðra (liðveisla). Róbert Örn Hjálmtýsson hefur sent frá sér fjórar plötur undir merkjum Hljómsveitin Ég. Valgeir Gestsson er gítarleikari hljómsveitanna Jan Mayen og Tálsýnar.

Upp upp mín sál - og mitt hjarta, milta, nýru, lungu og lifur með er óður til náttúrunnar, óður til gleðinnar, óður til ástarinnar. Hún er gegn kerfinu, gegn umhverfisspjöllum, gegn dauðarefsingu. Hún er upp upp mín sál.

Platan fylgir á eftir plötunni Viltu vera memm? þar sem ég söng fyrir börn á aldrinum 2-125 ára. Nú syng ég fyrir bæði lifendur og látna.

Öllum seldum eintökum, efnislegum sem óefnislegum, fylgir algjör syndaaflausn. Hlustandinn þarf ekki að hafa áhyggjur af því sem tekur við að loknu þessa heims amstri.

Og þetta lag, fyrsti singúllinn, verður ekki með á plötunni. Karmað í laginu þótti ekki nógu gott. (Ekki er hann nú heldur beint snoppufríður dúddinn sem er ásjóna myndbandsins).