Further Information

Þetta byrjaði haustið 2013 þegar við stofnuðum hljómsveitina Karl Orgeltríó í kringum Hammond orgelið hans Kalla. Það heitir Nína og er smíðað 1958. Vopnaðir og trommum og gítar spiluðum við fyrstu giggin okkar hálfsmánaðarlega á Bravó á Laugavegi 22.

Haustið 2015 byrjuðum við að vinna að þessari plötu með Ragga Bjarna, að velja lög og útsetja. Við gerðum prufuupptökur í Stúdíó Sýrlandi í janúar 2016 sem sumar hverjar enduðu á plötunni og í maí fórum við í Hljóðrita til að taka upp fyrir alvöru. Ásgeir fékk meira að segja lánaðan goðsagnakenndan gítar Jóns Páls heitins til að ljá upptökunum meiri dýpt. Raggi Bjarna mætti svo í Snjóhúsið, stúdíóið hans Kalla reglulega næsta hálfa árið til að syngja inn lögin.

Raggi Bjarna á hug og hjarta hvers íslendings því hann er ótrúlega hlý og bjartsýn manneskja. Hann er líka í toppformi og hefur eiginlega aldrei hljómað betur. Enda var sama hverjir voru beðnir um að vera með á plötunni, allir stukku til.Salka Sól og Katrín Halldóra sögðu já áður en spurningin kláraðist. Bakraddir annast Sigga Eyrún og Heiða Ólafs og gefa þær plötunni ljúfan og bjartan keim. Einnig leggja þeir Haukur Gröndal og Snorri Sigurðarson hönd á plóg með lúðrablæstri sem eru í anda gömlu Blue Note platnanna frá sjötta áratugnum.

Þannig að það er með miklu stolti sem við kynnum þessa plötu sem kemur út 5.október 2017.