Further Information

H&H hafa ákveðið að ráðast í söfnun til að endurútgefa úr sarpinum: Landnám (1991), Endanlega hamingju (1998) og Meira helvíti (2004) á vínil og snældum. Landnámið, sem er eina snældan sem hefur áður komið út með H&H, verður endurútgefin á snældu, en hinar plöturnar verða gefnar út á vínil. Upplagið verður takmarkað, og fáein eintök árituð og tölusett. Allur ágóði verður nýttur til að endurhljóðvinna efnið af plötunum í bestu mögulegu hljómgæðum. Í kjölfarið verður tónlistin gerð aðgengileg út um allt og líka í stafrænu niðurhali og á streymisveitum.

Allir kaupendur fá afhent sérmerkt, árituð, litprentuð, hjartnæm og gefandi þakkarbréf frá H&H sem vottorð fyrir inneign á vínilplötu(m) og/eða snældu í samræmi við þann pakka sem viðkomandi kaupir. Bréfin verða afhent fyrir jól í gegnum búð Helga og Beate, í bréfpósti eða í eigin persónu allt í samræmi við óskir og samtöl.

Með fyrirvara um að Covid valdi ekki frekari röskunum (les: rugli), verða allar tónlistarafurðir afhentar á árinu 2022 - tímanlega fyrir 16. júní konsertinn. Kaupendur sem versla pakka með öðrum afurðum fá þær afhentar fyrir jól (jólin 2021).

Góðum samskiptum heitið um afhendingardag. Flutningskostnaður innanlands verður enginn.

Líkt og heiti verkefnisins gefur til kynna er vel mögulegt að fleiri endurútgáfuverkefni líti dagsins ljós á komandi misserum.

Annars bera fæst orð minnsta ábyrgð. Best að kýla bara á þetta.