Further Information

HVAÐ Í PABBANUM ERT ÞÚ AÐ GERA?

Hvað í pabbanum ert þú að gera? - Inniheldur 190 hugmyndir að leikjum sem auðvelt er fara í heima. Enginn sími bara kjarnatími og samvera í rými. Leikirnir eru miskrefjandi en allir ætlaðir börnum á aldrinum 3-90 ára. Leikum okkur af því við getum það.

Augnsambandið er á undanhaldi þar sem karnival allrar afþreyingar er aðeins í seilingarfjarlægð. ,,Hvað í pabbanum ert þú að gera” er ætlað foreldrum sem vilja bjóða uppá skemmtilega samverustund þegar svarti skjárinn hefur verið settur tímabundið á svarta listann. Það að hafa ofan af fyrir sjáfum sér og sjá leik úr því sem umhverfið bíður uppá hverju sinni er viðleitni sem mig langar til að þjálfa. Minna gláp, meiri sköpun, spuni og leikur.

Að lokum er mælst til þess að framsetning sé hvetjandi og hress. Leikurinn kallar á fjárfestingu í tíma en metnaðurinn sem lagður er í framsetninguna sker úr um það hvort minningin sé mögnuð eða mykja.

Góða skemmtun.
Arnar Dan Kristjánsson leik-ari.

Hugleiðingar frá höfundi.

Mér hefur alltaf fundist gaman að leika mér og prufa það sem ég kann ekki. Einnig hef ég alltaf haft sérlegan áhuga á skítamixi. Þessi áhugi minn hefur markað að stórum hluta hvernig ég skynja umhverfið mitt. Leikurinn hefur kennt mér að spyrja spurninga, ég geri óteljandi mistök, gengst við þeim og legg mig fram við að draga af þeim lærdóm. Börn og allt ungviði eru fædd með þessi gildi á hreinu. Þau prófa, hrasa, læra og forvitnin leiðir þau á spennandi lendur. Ég meina ... leikgleðin og frjótt ímyndunarafl býr til fullkomið geimskip úr skeiðum á tveimur sekúndum.

Hvað í pabbanum ert þú að gera?
Vísar í spurninguna sem ég trúi að allir foreldrar spyrja sig: Hvernig get ég verið til staðar fyrir barnið mitt og búið til heilbrigt vinasamband og skilað þessu kraftaverki til manns.

Upphafið er spurningin en svo er kominn tími á aðgerðir.

Þessi leikjabanki minn kallar á samtal og stuðlar að augnsambandi og samveru. Ég trúi því að þar sé lykilinn falinn. Það hafa verið forréttindi að fá að kynnast strákunum mínum í gegnum leikina og fylgjast með þeim skerpa á samskiptagreindinni og takast á við mótlæti. Skjárinn er frábær í hófi en sem húsráðandi (sá sem stjórnar heimilinu) finnst mér hann leiðinlegur. Með útgáfu þessari langar mig að efla leikgleðina, þjálfa sköpunarkraftinn og stuðla að aukinni geðtengslamyndum.

Leikurinn er okkar skóli.

Mikil vinna hefur verið lögð í alla hönnun enda um 190 frumteiknaðar myndir að ræða en sú vinna er langt á veg komin. Þeir Johnny og Ómar Yamak sjá um hönnunina ásamt mér. Áhersla er lögð á að hvert spjald eða hver leikur skapi eftirvæntingu og forvitni.

Verkferlar:
1. Barn suðar.
2. ,,Hvað í pabbanum ert þú að gera" dregið fram.
3. Barn dregur spjald.
4. Leitað uppi númer spjalds í bæklingi og leikreglur skoðaðar, max 4 línur.
5. Undirbúningur hefst, fundið til það sem þarf.
6. Leikur spilaður.

Svör við algengum spurningum.

Má ég fara í símann?… Nei ekki núna en drögum leik.
Má ég fara í tölvuna?… Nei ekki núna en drögum leik.
Má ég horfa á sjónvarpið?… Nei ekki núna en drögum leik.
Má ég fara í Ipadinn?... Nei ekki núna en drögum leik.