Further Information

Kvikmyndahátíð framhaldsskólanna, KHF verður haldin í fimmta sinn þann 16. og 17. febrúar næst komandi í samstarfi við Bíó Paradís

Kvikmyndahátíð framhaldsskólanna verður 5 ára í ár. Þessum tímamótum verður fagnað sérstaklega á hátíðinni með því að bjóða upp á ýmislegt annað. Ávallt verður þó megináherslan á stuttmyndir framhaldsskólanema, en um 30 stuttmyndir, að meðaltali, hafa borist hátíðinni árlega. Við höfum einu sinni áður nýtt okkur möguleika Karolina Fund til að ná endum saman á fjármögnun hátíðarinnar og tókst vel. Hátíðin er styrkt af mennta- og menningarmálaráðherra og Kvikmyndamiðstöð Íslands, en okkar er að fjármagna það sem upp á vantar. Því freistum við þess að reyna það aftur núna í sama tilgangi í von um góðar undirtektir.

Vegna 5 ára afmælisins er stefnt að því að hátíðin verði veglegri en nokkru sinni og verði jafnframt sýnilegri í samfélaginu og þannig styrkari viðburður í félagslífi ungs fólks.

Skipuleggjendur hátíðarinnar 2017 ásamt verðlaunahöfum

Vandaðar stuttmyndir verða valdar á hátíðina og keppa þær um vegleg verðlaun

Verðlaun verða veitt fyrir bestu myndina, bestu tækniútfærslu og bestan leik. Dómnefnd skipa þrír einstaklingar sem allir hafa víðtæka reynslu úr kvikmyndagerð. Meðal verðlauna fyrir bestu stuttmynd hátíðarinnar er viku námskeið hjá New York Film Academy í New York eða Los Angeles.

KHF er skipulögð af framhaldsskólanemum fyrir ungt fólk í framhaldsskólum landsins. Fjölmargir þeirra koma að hátíðinni en hátíðarstjóri nú er Ísak Óli Borgarsson.

Kvikmyndahátíð framhaldsskólanna var fyrst haldin árið 2015. Það ár var hún haldin í húsnæði Fjölbrautaskólans við Ármúla en árið eftir var hún færð í Bíó Paradís og verður það vonandi framtíðarheimili hennar. Nemendur í FÁ stofnuðu hátíðina en hugmyndin spratt fram í áfanga sem fjallar um viðburðastjórnun, þ.e. uppsetning og skipulag viðburða. Nemendur skipuleggja allt sjálfir hvað varðar hátíðina, fjármögnun hennar, hönnun plakats og veglegrar sýningarskrár ásamt heimasíðu. Dagskráin er einnig alfarið skipulögð af nemendum. Hátíðin hefur oftast verið í samstarfi við Borgarholts- og Tækniskólann. Það berast stuttmyndir víðs vegar af landinu á hátíðina og stefnt er að því að sem flestir framhaldsskólar taki þátt í þessum ánægjulega viðburði. Því hvetjum við sem flesta framhaldskólanemendur að senda inn stuttmyndir og vera þannig virkir þátttakendur í skemmtilegum viðburði.

Hér er slóð á heimasíðu hátíðarinnar þar inni er hægt að finna ýmsar upplýsingar varðandi hátíðina og skoða verðlaunamyndir frá fyrri hátíðum. Þar er einnig að finna umsóknarslóðina.
Athugið umsóknarfrestur er til 28. febrúar 2019. http://filmfestival.is

Hátíðarstjóri KHF 2018 Þórdís Helgadóttir ásamt leikurunum Arnari Jónssyni sem fór með hlutverk í verðlaunamyndinni ,,Reglur leiksins'' eftir Maríu Carmelu Torrini og Guðmund Elí Jóhannsson, og Karli Ágústi Úlfssyni sem var einn af tveimur heiðursgestum hátíðarinnar, hinn var Dóra Jóhannsdóttir leikkona og handritshöfundur.