Rjúkandi - fargufa

Ég hef um langa hríð laðast að töfrum hafsins og starfað við baðmenningu en ég var rekstrarstjóri Ylstrandarinnar í Nauthólsvík árin 2005-2016 og hef starfað sem Gúsfrú Rjúkandi fargufu síðastliðið árið. Ég hef tenginu í vetrarbaðmenningu í Kaupmannahöfn og hef kynnt mér sérstaklega gufubaðsmenningu og stundað saunagus í Danmörku og Svíþjóð.

Ég átti mér draum um að bjóða uppá þessa athöfn á Íslandi og hafa hana aðgengilega fyrir sem flesta. Rjúkandi fargufa fór af stað haustið 2019 og við elskum þessa dásemd. Áhangendur og aðdáendur Rjúkandi eru magnað fólk og gufugusurnar gefa af sér þvílík gæði í formi vellíðunar, skemmtunar og afslöppunar.

Mobile Sauna eða ferðagufuböð er eitthvað sem þekkist víða um heim. Færanlegum gufuböðum er komið fyrir á mismunandi stöðum til þess að geta notið gufubaðs í návígi við náttúruna.

Hugmyndafræði Rjúkandi byggir á þessu og viljum við svara ákveðinni þörf sem er svo greinileg hér á landi. Við munum bjóða upp á upplifanir sem innihalda eftirfarandi:

Gufugusuathöfn í sérhannaðri fargufu

Kalt bað í sjó eða vatni

Nærandi náttúra og umhverfi

Gufugusa er evrópskt gufubaðsritúal sem byggir á nokkrum lotum í gufubaði þar sem uppistaðan er að sveifla klæði í átt að fólki til að auka hitann hjá hverjum og einum. Gufugusa getur verið margskonar og fer það eftir hugmyndaflugi þess sem stjórnar athöfninni hvað hann býður upp á við hverja fötu. Talað er um að hver lota sé ein fata og þá er átt við vatnsfötuna sem notuð er í gufubaðinu til að ausa yfir steinana. Því hefur verið haldið fram að athöfn sem þessi hafi hreinsandi áhrif á líkamann, lækki blóðþrýsting og styrki ónæmiskerfið.

Með fargufunni er hægt að bjóða uppá slíkar athafnir á fallegum stöðum í náttúrunni. Að stíga út úr sjóðandi heitri gufunni eftir hverja lotu og beint í villta náttúruna myndi auka gæði athafnarinnar til muna og væri þá tilvalið að demba sér í kaldann sjóinn til að kæla sig niður fyrir næstu lotu.

Rjúkandi er gufubað á hjólum og býður upp á svokallaðar gufugusur. Gufugusa er 3ja lota sánaupplifun þar sem hver lota inniheldur mikinn hita, ilmolíur, viftur með handklæði eða blævængjum og tónlist.

Við nýtum okkur þarann þegar við erum við hafið þar sem hann er eðalefni fyrir húðina

Gúsfrúin stjórnar gusunum ... mikill hiti og mikill sviti

Gusan tekur um klukkutíma í heildina með kælingu, drykk og snarli á milli lota. Hver Gusa er einstök og sérstaklega útbúin eftir aðstæðum.

Við staðsetjum okkur oftast við hafið til að hægt sé að dýfa sér í nærandi kælingu á milli lota og eftir gusu eða góða stund í opinni sánu.

Ilmolíurnar eru stór partur af upplifuninni í gusunum og geta verið innlegg í upplifun dagsins hjá fólki. Þar velur Gúsfrúin ilmi í takt við tíma dags, vikudag, tunglstöðu, sólstöðu eða mögulega áætlanir hópsins.

Þegar inn er komið verður amstur dagsins eftir úti. Athyglin fer í líðanina og hvernig takast á við hitann, ilminn og tónlistina

Við höfum mikið verið við Ægissíðuna þar sem grásleppuskúrarnir setja sinn svip á svæðið.

Þar hefur myndast dásamleg hverfisstemning þar sem foreldrar, börn og ömmur og afar mæta saman að baða sig í sjónum og hita sig upp í gufunni á milli.

Álftanesið hefur æðislega fjöru og fallega sýn yfir opið hafið

Kársneshöfnin býður upp á magnað adrenalínkikk þar sem hægt er að hoppa í sjóinn. Þar veljum við hvort fallið sé hátt eða lágt eftir sjávarföllum og auglýsum viðburðina með því augnamiði

Svo er líka frábær aðstaða austan við Kársneshöfnina. Þar hoppar maður í sjóinn eða gengur niður bátarampinn, eftir því í hvernig skapi maður er þann daginn.

Skarfakletturinn og ströndin við hann er falin paradís í borginni. Þar eru andstæðurnar skemmtilegar þar sem Rjúkanda er lagt milli rúta á stóru iðnaðarbílaplani. Þar eru oft stór skemmtiferðaskip á aðra hönd og svo gengur maður niður í draumaveröld á hvíta ströndin.

Afmælisgusur og hverskyns einkahúllumhæ eru einstakir viðburðir þar sem hægt er að sérsníða Gusuna að þeim sem hún er haldin til heiðurs.

Rjúkandi er og verður viðarkyntur svo við séum aðeins háð aðgengi, þar spilar einnig inn í að hafa frumefnin þrjú með okkur - loft - vatn - eld

Ávinningur af gufubaði er margvíslegur, til að mynda eflist ónæmiskerfið, hefur góð áhrif á blóðþrýstinginn og eflir hjarta og æðakerfið. Með ilmolíum er hægt að efla þessi áhrif enn frekar.