Further Information

Því er haldið fram að maður eigi aldrei að ræða pólitík, íþróttir eða trúmál með glas í hönd. En hvað ef við gerum það bara samt? Þú getur ekki sagt mér hvað ég má gera! Þú ert ekki alvöru pabbi minn!

Nú hafa sjentílmennirnir og heimsborgararnir Birgir Már Sigurðsson og Gísli Gunnar Didriksen Guðmundson tekið höndum saman við að færa þér og þínum áhugaverða þjóðfélagsumræðu út frá sjónarmiði tveggja ólíkra aðila með nokkra drykki í sér. Þættirnir verða í hinu svokallaða hlaðvarps-formi sem gerir fólki kleift að hlusta í gegnum netið á símanum, tölvunni og í öðrum nettengdum tækjum, hvar sem er, hvenær sem er.

Fyrirkomulag hvers þáttar

Í hverjum þætti fá piltarnir áhugaverða aðila úr þjóðlífinu í heimsókn til þess að ræða málefni líðandi stundar og sötra viskí. Hver þáttur verður rúmar 30 mínútur að lengd og kemur nýr þáttur út í hverri viku.

Þáttastjórnendur eiga það til að svífa milli heima og geima í umræðum sín á milli og eru gestir hvattir til að gera það sama. Úr verða áhugaverðar samræður sem renna ljúft niður og skilja eftir gott eftirbragð.

Þáttastjórnendurnir

Birgir Már er grafískur hönnuður að mennt en starfar nú við áfengisframleiðslu. Hann hefur verið áhugamaður um viskí frá því vel fyrir áfengisaldur og hefur heimsótt yfir 30 viskíframleiðslur víðsvegar um heiminn. Hann er stofnandi og eigandi Þoran Distillery ehf. sem er um þessar mundir að þróa íslenskt viskí.

Gísli Gunnar er með BA gráðu í japönsku máli og menningu og veit sitt hvað um sumt. Hann er annars menntaður tónlistarmaður sem hefur komið fram með hinni og þessari hljómsveitinni á viðburðum á borð Iceland Airwaves og Eistnaflugi. Hann vinnur nú nýtt efni undir eigin nafni ásamt því að teikna myndasögur í frítíma sínum.

Tækjakaup

Til að tryggja góð upptökugæði og einfalda og reglulega framleiðslu á þáttunum hafa drengirnir í hyggju, með ykkar hjálp, að kaupa tæki og tól sem henta verkefninu. Þessi tæki eru ekki af dýrustu sortinni en þó ekki þeirri ódýrustu heldur. Núþegar hefur verið útvegað húsnæði, eftirvinnsluforrit og tölvubúnað. Þau tæki sem á eftir að kaupa inn eru eftirfarandi:

Shure SM58 hljóðnemar
Shure heyrnarartól
Apogee Quartet pre-amp/converter
Hljóðnemastandar
Snúrur og kaplar