Further Information

Skólahljómsveit Kópavogs var stofnuð haustið 1966 en miðar afmælisdag sinn við fyrstu tónleikana sem haldnir voru við Kársnesskóla þann 22. febrúar 1967. Síðan þá hefur hljómsveitin ætíð verið í fremstu röð íslenskra skólalúðrasveita, haldið fjölmarga tónleika innanlands sem utan og gefið út fjórar hljómplötur/geisladiska. SK fagnar þessu hálfrar aldar afmæli sínu með því að gefa út geisladisk með úrvali af því besta sem hljómsveitin hefur upp á að bjóða. Um 200 börn og unglingar tóku þátt í upptökunum og skiluðu 15 lögum til útgáfu á diskinn sem nú bíður framleiðslu.

Við val á lögum á þessa afmælisútgáfu var leitast við að hafa á boðstólum fjölbreytta tónlist og gera íslenskri tónlist hátt undir höfði. Gaman er að geta þess að tvö laganna voru samin af ungum hljóðfæraleikurum í SK með 10 ára millibili. Vinalagið samdi Sif Þórisdóttir árið 2005 og haustið 2015 samdi Elsa Lóa McLemore lagið um skemmtilega broskallinn.

Viðamesta tónverkið á disknum er án efa Cry of the Last Unicorn e. Rossano Galante, sem lýsir því þegar veiðimenn elta uppi síðasta einhyrninginn og ráða honum bana. Auðvelt er að ímynda sér söguna og framvinduna þegar hlustað er á þetta glæsilega tónverk. Annað viðamikið verk er Þursafónían, sem unnin er upp úr útsetningum Þursaflokksins á íslenskum þjóðlögum og frumsömdum lögum Egils Ólafssonar í þjóðlagastíl. Upptakan var gerð á 60 ára afmælistónleikum Kópavogsbæjar í Kórnum þann 10. maí 2015.

Heimildamynd um sögu SK í 50 ár er einnig í vinnslu, og áætlað er að hún verði tilbúin í júní 2017. Myndin verður um 50 mínútur að lengd og mun greina frá helstu afrekum sveitarinnar frá stofnun hennar til dagsins í dag.

Nemendur SK eru spenntir að sjá afrakstur vinnu sinnar verða að veruleika og leita því eftir stuðningi til að fjármagna lokahnykkinn á framleiðslu þessara skemmtilegu diska. Við erum afskaplega þakklát fyrir allan stuðning.