Við erum Kammerkór Suðurlands og erum á leiðinni til London að halda tónleika sem marka hápunkt ferils kórsins til þessa. Við leitum til þín um aðstoð við að fjármagna ferðina til London með því að kaupa af okkur eitt af áheitunum sem við getum boðið þér hér til hægri.    

--- English description here ---



Kammerkór Suðurlands heldur tónleika í hinni fornfrægu dómkirkju í Southwark í Lundúnum 15. nóvember næstkomandi. Tónleikana skipuleggur breska umboðsskrifstofan Curated Place í samvinnu við Sound and Music og stjórnanda Kammerkórs Suðurlands. Þar frumflytur Kammerkór Suðurlands nýtt kórverk, Three Shakespeare Sonnets, eftir Sir John Tavener eitt fremsta tónskáld Breta. Það er kórnum mikill heiður að Sir John Tavener hefur valið Kammerkór Suðurlands til að frumflytja nokkur verka sinna, en samstarfið við tónskáldið hefur staðið í um áratug. 

Það verða fleiri spennandi verk flutt á tónleikunum. Jack White, breskt ungt tónskáld, var valinn af bresku tónlistarsamtökunum Sound and Music sem skærasta unga stjarna Breta í dag, til að semja fyrir kórinn nýtt verk fyrir tónleikana. Hann hefur unnið í nánu samstarfi með kórnum undanfarið í þessum tilgangi, ásamt Sjón, sem semur ljóðið. 

Þá verða flutt fleiri verk eftir Tavener eins og Song for Athene, sem flutt var við útför Díönu prinsessu, og nýleg verk eftir ung íslensk tónskáld, þar á meðal Kjartan Sveinsson, kenndan við SigurRós, Báru Grímsdóttur og Örlyg Benediktsson.    

Kammerkór Suðurlands er skipaður ungu tónlistarfólki, tónskáldum og áhugamönnum víðs vegar af Suðurlandi. Stofnandi og stjórnandi kórsins frá upphafi er Hilmar Örn Agnarsson. Kórinn er þekktur fyrir fjölbreytt efnistök, syngur allt frá jazz og dægurtónlist  til tónverka sem endurspegla nýjustu strauma í samtímatónlist. Kórinn hefur m.a. komið fram á Jazzhátíð í Reykjavík og Myrkum músíkdögum og á þessu ári hefur kórinn komið fram á Tectonics tónlistarhátíðinni og á Listahátíð í Reykjavík, þar sem hann tók þátt í gjörningi Magnúsar Pálssonar. Þá tók kórinn þátt í frumflutningi á óperunni Ragnheiður eftir Gunnar Þórðarson í Skálholti og í október syngur kórinn við friðarsúlu Yoko Ono og á 60 ára afmælistónleikum Eglis Ólafssonar. Næsta sumar hefur kórnum verið boðið að syngja á Listahátíð í Reykjavík, tónlistarhátíðum í Salisbury og Cheltenham á Englandi og alþjóðlegu kóramóti í Umeå í Svíþjóð. Vigdís Finnbogadóttir er verndari Kammerkórs Suðurlands.    



Platan Heilagur draumur með tónlist Sir Tavener, sem kórinn gaf út árið 2010, var valin plata mánaðarins í hinu virta breska tónlistartímariti Gramophone og tilnefnd til Íslensku tónlistarverðlaunanna.    

Flytjendur á tónleikunum 15. nóvember:  Kammerkór Suðurlands, stjórnandi Hilmar Örn Agnarsson  Einsöngvarar: Elísabet Einarsdóttir, Björg Þórhallsdóttir, Guðrún Jóhanna Ólafsdóttir, Tui Hirv, Elísabet Einarsdóttir, Eyjólfur Eyjólfsson, Hrólfur Sæmundsson og Adrian Peacock.